ខាងក្រោមគឺជាហេតុផលដែលខ្ញុំចង់ណែនាំអ្នកទាំងអស់គ្នាអោយមកស្គាល់ពីមូលហេតុដែលអ្នកគួរតែប្រើប្រាស់ Brave Browser។​

១. ទប់ស្កាត់ការលួចតាមដាន និងលួចទិន្នន័យពីសំណាក់គេហទំព័រ និងក្រុមហ៊ុនបច្ចេកវិទ្យាធំៗ (Block tracker and databroker)

ដូចដែលអ្នកទាំងអស់គ្នាបានដឹងមកហើយ ការប្រើប្រាស់បណ្តាញអ៊ីនធើណិតនៅលើ browser គឺជារឿងមួយដែលមានហានិភ័យ និងពុំមានសុវត្ថិភាព ឬឯកជនភាពបានគ្រប់ ១០០ ភាគរយនោះឡើយបើគ្មានការចូលរួមការពារ ពីអ្នកប្រើខ្លួនឯងផ្ទាល់ បូករួមជាមួយនឹងកម្មវិធី software ដែលជួយដល់អ្នកប្រើក្នុងការពារនូវហានិភ័យទាំងអស់នោះ ។ ជាការពិតណាស់ ក្រុមហ៊ុនបច្ចេកវិទ្យាធំៗទាំងឡាយ តែងតែប្រើប្រាស់វិធីសាស្ត្រដូចៗគ្នាក្នុងការទាញយក នូវផលប្រយោជន៍ពីសំណាក់អ្នកប្រើប្រាស់របស់ខ្លួន តាមរយៈការប្រមូលយកទិន្នន័យរបស់អ្នកប្រើប្រាស់ យកទៅលក់អោយក្រុមហ៊ុនបុត្រសម្ព័ន្ធ ឬក្រុមហ៊ុនទី៣ (Third-party) ដើម្បីទទួលបានចំណូល។ ការប្រមូលទិន្នន័យ បើស្តាប់មួយភ្លែតទៅ យើងអាចនឹងគិតថា ជាធម្មតាទេ យើងប្រើប្រាស់លើ platform របស់គេ ព័ត៌មាន និងទិន្នន័យរបស់យើងច្បាស់ជានៅលើការគ្រប់គ្រង់របស់គេហើយ ចង់ធ្វើយ៉ាងណាក៏គេនៅតែអាចដឹងបានដែរ។ រឿងនេះពិតជាត្រឹមត្រូវ ក៏ប៉ុន្តែអ្នកដឹងទេថា ទិន្នន័យដែលគេប្រមូលទៅនោះ គឺមិនត្រឹមតែជាទិន្នន័យសាមញ្ញធម្មតាៗប៉ុណ្ណោះទេ ពោលគឺរាល់ចរាចរណ៍ រាល់ព័ត៌មាន រាល់ឯកជនភាពរបស់អ្នកទាំងអស់គ្នា គឺ ត្រូវបានគេតាមដានខ្លមមើល និងប្រមូលយកទៅទាំងអស់ ដែលនោះគឺជារឿងមួយដែលគួរអោយខ្លាចខ្លាំងមែនទែន។ មិនមាន browser ច្រើនទេដែលអាចជៀសវាងចំណុចនេះបាន ដោយសារ browser ភាគច្រើន គឺសុទ្ធតែបង្កើតឡើងដោយក្រុមហ៊ុនប្រមូលទិន្នន័យទាំងអស់នោះដដែល។ លើកលែងតែ browser ដែលពេញនិយមខ្លះមានដូចជា Mozilla Firefox, Mullvad Browser, Librewolf និងជាពិសេសគឺ Brave នេះឯង។ Brave មានមុខងារក្នុងការជម្រះចោលនូវរាល់ការតាមដាន និងលួចទិន្នន័យបានល្អខ្លាំងមួយ ដែលមានមកស្រាប់តែម្តង ដោយពុំចាំបាច់តម្លើង extension ពីក្រៅឡើយ។ Brave ថែមទាំងកត់ត្រាទុកនូវចំនួនដែលវាបាន ជម្រះចោលទៀតផង ដែលពេលខ្លះយើងអ្នកប្រើខ្លួនឯងសឹងតែមិនជឿថា កន្លែងដែលយើងធ្លាប់ទុកចិត្ត និងប្រើមកជាយូរហើយ បែរជាមានការតាមដានច្រើនដល់ម្លឹង។ មូលហេតុមួយផ្សេងទៀតដែលអ្នកអាចទុកចិត្ត Brave ថា នឹងមិនប្រមូលយកទិន្នន័យរបស់អ្នក គឺដោយសារតែ Brave Software ជាក្រុមហ៊ុនឯករាជ្យមួយរបស់លោក Brendan Eich ដែលជាអ្នកបង្កើតភាសា JavaScript ជាអតីតស្ថាបនិកនៃ Mozilla Firefox ផងដែរ ដែលលោកមានបទពិសោធន៍ និងឆន្ទៈក្នុងការការពារទិន្នន័យ និងឯកជនភាពរបស់អ្នកប្រើរាប់ឆ្នាំមកហើយ ។ លើសពីនេះ Brave Browser គឺជា open-source project ដែលមានន័យថាវាជា software ដែលមាន ការចូលរួមកសាង និងអភិវឌ្ឍន៍ដោយអ្នកអភិវឌ្ឍន៍ជាច្រើននៅទូទាំងពិភពលោក និងបើកចំហ source code ជាសាធារណៈ មិនមានការលាក់បាំងដូច Browser ដទៃឡើយ ដែលនេះរឹតតែធ្វើអោយអ្នកប្រើកាន់តែមានទំនុកចិត្តទៅលើ Brave បន្ថែមទៀត។ ខាងក្រោមគឺជាការធ្វើតេស្តកម្រិតធ្ងន់ពី PrivacyTests.org លើផ្នែកសុវត្ថិភាព និងឯកជនភាពជាច្រើនប្រភេទ។

"Imagine that everywhere you go, everything you do on the internet; are tracked and closely monitored. Then all of the information gathered about you is sold to the highest bidder by the internet giants (you know them). That’s how the internet works today, but there is a solution" – Brave Browser

២. ការជម្រះចោលផ្ទាំងពាណិជ្ជកម្ម និង Pop-up (Built-in Ads Blocker)

មិនមាននរណាម្នាក់ចូលចិត្តនឹងការមើលពាណិជ្ជកម្មទេត្រូវអត់? តែយើងមិនអាចប្រកែកបានទេថាសឹងតែគ្រប់បណ្តាញទស្សនាអនឡាញដែលយើងប្រើប្រាស់សព្វថ្ងៃដូចជា YouTube និងគេហទំព័រជាច្រើនសុទ្ធតែមាននូវផ្ទាំងពាណិជ្ជកម្ម។ ភាគច្រើននៃអ្នកប្រើប្រាស់គឺសុទ្ធតែប្រើប្រាស់នូវ Ads Blocker Extension ឬយើងហៅថាជា Tool សម្រាប់បិទផ្ទាំងពាណិជ្ជកម្មនៅលើគេហទំព័រ ដែលល្បីភាគច្រើនមានដូចជា៖

• AdBlock — best ad blocker
• uBlock Origin
• AdGuard
• Adblock Plus ជាដើម ។

ដែលវាទាំងអស់នេះថ្វីត្បិតតែធ្វើការបានល្អប្រសើរគ្រាន់បើ តែយើងកុំភ្លេចថាវាគឺជា Third-party extension ដែលប្រើប្រាស់កូដ JavaScipt ដើម្បីទៅកែប្រែ Ads Algorithm របស់គេហទំព័រដែលមានពាណិជ្ជកម្មទាំងនោះ អោយលុបពាណិជ្ជកម្មចេញ ហើយយើងពុំអាចមើលដឹង ឬឆែកពីកូដដែលគេបានសរសេរអ្វីខ្លះឡើយទៅក្នុង extension ទាំងនេះ ដូច្នេះវាអាចនឹងមានហានិភ័យ បើទោះជាមានការ verified និងឆ្លងកាត់ការត្រូតពិនិត្យពី store ក៏ដោយ។ ចំណែកចំពោះ Brave វិញ គឺមានមុខងារសម្រាប់បិទឃាំងផ្ទាំងពាណិជ្ជកម្មស្រាប់តែម្តង ដែលត្រូវបានសរសេរឡើង និង integrate ដោយ Brave Software ផ្ទាល់តែម្តង (Built-in) ហើយវាថែមទាំងធ្វើការបានល្អខ្លាំងមែនទែន។ Brave ផ្តល់អោយយើងចំនួន ៣ ជម្រើសដើម្បីប្រើប្រាស់មុខងារមួយនេះ ៖

• Allows all tracker & ads (Not recommended) : សម្រាប់បើកអនុញ្ញាតអោយគេហទំព័រដែលអ្នកកំពុងប្រើ អាចធ្វើការបង្ហាញពាណិជ្ជកម្មវិញបាន ក្នុងករណីដែលអ្នកចង់ support ទៅកាន់អ្នកផលិតមាតិកា និងគេហទំព័រជាដើម។
• Blocks trackers & ads (Default & Recommended) : ជាជម្រើសដែលបើកដោយស្វ័យប្រវត្តិរាល់ពេលអ្នកចូលទៅកាន់គេហទំព័រណាមួយ ដើម្បីធ្វើការបិទចោលនូវផ្ទាំងពាណិជ្ជកម្ម និងការពារការតាមដានទិន្នន័យពីសំណាក់ Trackers ។
• Agressively blocks trackers & ads (Additional) : ជាជម្រើសមួយទៀតបន្ថែមពីលើការបិទពាណិជ្ជកម្ម ដែលមុខងារមួយនេះគឺប្រើនៅពេលណាដែលមុខងារទីពីរមិនដំណើរការ (កម្រ) ឬធ្វើការបិទមិនបានល្អ (ករណីពាណិជ្ជកម្មច្រើនខ្លាំងពេក និង Ads Algorithm ខ្លាំង) អ្នកអាចបើកវាបានដើម្បីកាន់តែពង្រឹងមុខងារនេះបន្ថែមទៀត ប៉ុន្តែអ្នកមិនគួរប្រើវាជា Default ពេកទេ ព្រោះការបិទ Ads ខ្លះគឺអាចធ្វើអោយ មុខងារខ្លះរបស់គេហទំព័រមួយនោះ ដំណើរការមិនបានល្អ ឬគាំងតែម្តង ដែលតម្រូវអោយយើងបន្ថូរបន្ថយ និងអនុញ្ញាតពាណិជ្ជកម្មខ្លះទើបដំណើរការ ដែលជម្រើសទី២ គឺល្អបំផុត។

បន្ថែមពីលើនេះ តាមរយៈព័ត៌មានដែលប្រកាសចេញដោយ Google បានអោយដឹងថា គ្រប់ Web Browser ទាំងអស់ដែលប្រើប្រាស់បច្ចេកវិទ្យា​ Chromium គឺនឹងត្រូវទទួលនូវការធ្វើបច្ចុប្បន្នភាពថ្មីដែលហៅថា Manifest V3 នឹងមានការផ្លាស់ប្តូរមួយដែលទាក់ទងទៅនឹង Ads Blocker Extension ទាំងអស់នឹងត្រូវបាត់បង់មុខងារក្នុងការបិទពាណិជ្ជកម្ម មិនដំណើរការដូចមុន ឬត្រូវបានដកចេញពីក្នុង Chrome Web Store តែម្តង។ ដូច្នេះចាប់ពីខែមករា ឆ្នាំ២០២៤ តទៅ គ្រប់ Browser ដែលប្រើប្រាស់បច្ចេកវិទ្យា Chromium នឹងត្រូវបាត់បង់ Ads Blocker Extension ដែលក្នុងនោះរួមមាន brave ផងដែរ តែដោយសារ brave មានមុខងារ Ads Blocker Built-in ដោយខ្លួនឯងស្រាប់ហើយ ដូច្នេះវានឹងមិនជះឥទ្ធិពលអ្វីដល់អ្នកប្រើ brave ឡើយ ។

៣. ការបិទឃាំងនូវ Fingerprinting និង Cross-site cookies

Fingerprinting ចំពោះ Cybersecurity គឺជាការ detect ទៅលើឧបករណ៍ដែលអ្នកកំពុងប្រើ , network protocols , កម្មវិធីដែលអ្នកកំពុងប្រើ ឬប្រព័ន្ធប្រតិបត្តិការតាមរយៈ network ។ Tracker អាចប្រើប្រាស់វាដើម្បីតាមដានអ្នក ប្រសិនបើអ្នកមិន មានការការពារ ឬមិនប្រុងប្រយ័ត្ន។ ឯ Cross-site cookies គឺសម្តៅទៅលើ cookie ទាំងឡាយណាដែលប្រើប្រាស់លើសពីតម្រូវការដែលអ្នកប្រើ និងគេហទំព័រត្រូវការ និងផ្ទុកទិន្នន័យដែលមិនពាក់ព័ន្ធទៅនឹងមាតិកាដែលអ្នកប្រើកំពុងប្រើ វាអាចនាំមកនូវ ការប៉ះពាក់ដល់ ល្បឿន Network bandwidth ហើយថែមទាំងអាចនាំមកនូវ ransomware និង cyber attack ដូចជា CSRF (cross-site request forgery) attacks ផងដែរ។ នៅលើ Brave មុខងារ Blocks Fingerprinting និង Blocks cross-site cookie គឺមាន built-in មកជាមួយស្រាប់ និងបើកដំណើរការស្វ័យប្រវត្តិតែម្តង។

៤. Page Loading មានល្បឿនលឿន និងសន្សំសំចៃ Data Bandwidth

យោងទៅតាមការតេស្តតាមរយៈគេហទំព័រជាច្រើនបានបង្ហាញថា Brave មានល្បឿនក្នុងការចូល និងបង្ហាញគេហទំព័រ ឬយើងហៅថា Page Loading / Reloading បានលឿនខ្លាំងមែនទែនបើទៅនឹង browser ល្បីៗដទៃដូចជា Google Chrome, Mozilla Firefox, Microsoft Edge, Arc Browser, Safari, Samsung Browser, Vivaldi, Opera/Opera GX ជាដើម។ គួរបញ្ជាក់ផងដែរថា ការធ្វើតេស្តនេះគឺផ្អែកទៅលើ ការប្រើប្រាស់ Browser Benchmark ល្បីៗដូចជា MotionMark, JetStream និង Speedometer ជាដើម។ ការតេស្តនេះគឺធ្វើឡើងតែនៅលើកុំព្យូទ័រតែប៉ុណ្ណោះ តែក៏មានទិន្នន័យពីសំណាក់អ្នកផលិតមាតិកាផ្សេងៗក៏បានធ្វើការតេស្ត សាកល្បងទាំងនៅលើទូរស័ព្ទ Android និង iOS ផងដែរ ដែលសុទ្ធតែបង្ហាញថា Brave មានល្បឿនលឿនជាងបើធៀបទៅនឹង browser ផ្សេងៗ។ មូលហេតុដែលធ្វើអោយ Brave មានល្បឿនបង្ហាញលឿនបែបនេះគឺ ត្រូវអរគុណទៅដល់ Built-in Ads Blocker និង​ Tracker Algorithm របស់ Brave ដែលបានធ្វើការច្រោះ និងជម្រះចោលនូវពាណិជ្ជកម្ម ដែលជះឥទ្ធិពលមកលើល្បឿនក្នុងការ Loading Page និងធ្វើអោយកកស្ទះ នូវសាច់មាតិកាពិតប្រាកដ។ គួរបញ្ជាក់ផងដែរថា ល្បឿននេះគឺគ្រាន់តែជាការតេស្ត Benchmark តែប៉ុណ្ណោះ ចំពោះការប្រើប្រាស់ជាក់ស្តែង គឺវាអាចមានភាពខុសគ្នាបន្តិចបន្តួច ផ្អែកទៅលើប្រព័ន្ធប្រតិបត្តិការ និងប្រភេទឧបករណ៍ដែល អ្នកប្រើ គេហទំព័រដែលអ្នកបើក និងលក្ខខណ្ឌមួយចំនួនទៀតដែលអាចជះឥទ្ធិពលលើពិន្ទុ Benchmark ផងដែរ។ ទោះជាយ៉ាងណា Brave នៅតែជា browser ដែលត្រូវបានអ្នក review ជាច្រើនបានលើកសរសើរ ណែនាំ និង ចាត់ទុកជា browser មួយក្នុងចំណោម browser ដែលលឿនបំផុតនៅពេលនេះ។

៥. មុខងារពហុគណនី (Multi-account) និង Built-in Password Manager

មុខងារនេះអាចថាមិនសូវគួរអោយលេចធ្លោខ្លាំងនោះទេ ដោយសារតែ browser ល្បីៗដូចជា Google Chrome និង Microsoft Edge ជាដើម សុទ្ធតែមាន តែក៏មិនមែន browser ទាំងអស់សុទ្ធតែមាននោះដែរ។ មុខងារនេះមានអត្ថប្រយោជន៍ ចំពោះអ្នកប្រើប្រាស់គួរសមដែរ ដោយអនុញ្ញាតអោយអ្នកប្រើ អាចធ្វើការផ្លាស់ប្តូរគណនីខ្លួនឯង និងមានបុគ្គលិកលក្ខណៈផ្សេងៗគ្នា។

៦. ងាយស្រួលក្នុងការ Back-up data និង Synchronization ពីឧបករណ៍មួយទៅឧបករណ៍ផ្សេងៗ

Synchronization គឺជាការភ្ជាប់គ្នាទៅវិញទៅមក និងចែករំលែកទិន្នន័យរួមគ្នានៅលើឧបករណ៍ផ្សេងៗគ្នាដែលប្រើប្រាស់គណនីតែមួយ។ ការ Back-up data និង Synchronization ពិតជាមានសារៈសំខាន់ខ្លាំងសម្រាប់អ្នកប្រើ ពីព្រោះវាបង្កនូវភាពងាយស្រួលក្នុងការប្រើប្រាស់រួមគ្នារវាងឧបករណ៍ទាំងអស់ដែលអ្នកប្រើចង់បាន។ ការ Back-up data និង Synchronization នៅលើ Brave មានលក្ខណៈងាយស្រួល និងរហ័សខ្លាំងមែនទែន ដោយគ្រាន់តែ ទាញយកកម្មវិធី Brave នៅលើឧបករណ៍ទាំងនោះ រួចចូលទៅក្នុង Setting និង Sync បន្ទាប់មកដោយ គ្រាន់តែយកឧបករណ៍នោះ scan នូវ QR code (ចំពោះទូរស័ព្ទ ឬ Tablet ដែលមាន Camera) ដែល generate ដោយ Brave ពីឧបករណ៍ដើម ហើយជ្រើសរើសនូវទិន្នន័យណាខ្លះដែលអ្នកចង់ sync (ឧទាហរណ៍៖ Bookmarks, History, Password Manager, Settings, Web apps (PWAs), Extension, Theme, Reading list និងព័ត៌មានមួយផ្សេងៗទៀត ឬអ្នកចង់ផ្ទេរទាំងអស់ក៏បាន) អោយឧបករណ៍នោះ ទទួលបានជាការស្រេច ឬបើអ្នកមិនចង់ scan នូវ QR code អ្នកក៏អាចធ្វើការបញ្ជូលនូវ Sync Chain Code ដែល generate ដោយ Brave ក៏បានក្នុងករណីដែលឧបករណ៍អ្នកមិនមាន Camera ឬមិនអាចធ្វើការ scan បាន។

៧. មុខងារចាក់សោការពារការលួចបើក Brave Browser (សម្រាប់ iOS ប៉ុណ្ណោះ)

មុខងារនេះអាចថាមិនសូវសំខាន់ខ្លាំងនោះទេ ក៏ប៉ុន្តែសម្រាប់អ្នកដែលចង់ការពារនូវទិន្នន័យ Browser របស់ខ្លួនបន្ថែមមួយជាន់ទៀតអាចប្រើប្រាស់វាបាន សម្រាប់អ្នកប្រើប្រាស់លើប្រព័ន្ធប្រតិបត្តិការ iOS តែប៉ុណ្ណោះ។ សម្រាប់អ្នកប្រើប្រាស់ Android អាចប្រើប្រាស់នូវកម្មវិធីជំនួយទី៣ (Third-party application) សម្រាប់ lock Brave ក៏បាន ដោយសារតែមិនមានការ built-in មកស្រាប់ដូច iOS ឡើយ។

៨. មុខងារចាក់សម្លេង ឬចម្រៀងនៅផ្ទៃខាងក្រោយ និងបិទអេក្រង់ និងមុខងារទាញយកវិដេអូ ឬសម្លេងសម្រាប់ប្រើប្រាស់ពេលគ្មានអុីនធើណិត

មុខងារ Background Play គឺជាមុខងារថ្មីមួយ និងមានអត្ថប្រយោជន៍ខ្លាំងចំពោះអ្នកដែលចូលចិត្តបើកវីដេអូ YouTube ឬ YouTube Music ដែលចង់បើកស្តាប់បណ្តើរ និងបិទអេក្រង់បណ្តើរ ឬចាក់ចេញពីកម្មវីធីតែម្តង ដើម្បីធ្វើការងារផ្សេង។ មិនតែប៉ុណ្ណោះ បន្ថែមពីលើមុខងារនេះ Brave ក៏បានផ្តល់នូវមុខងារពិសេសមួយទៀតគឺ Brave Playlist ជាការទាញយកឯកសារសម្លេង និងវីដេអូ ចេញពីគេហទំព័រទាំងឡាយ ដែលមាននូវមាតិកាសម្លេង ឬវីដេអូ ដើម្បីរក្សាទុកលើឧបករណ៍ផ្ទាល់ក្នុងការប្រើប្រាស់នៅពេលគ្មានអុីនធឺណិតផងដែរ។

📚 ប្រភព និងឯកសារពាក់ព័ន្ធសម្រាប់ស្វែងយល់បន្ថែម

• Brave Repository
• PrivacyTests.org
• Brave Playlist